www.eethalayanews.com
  New Page 1
New Page 1
Eethalaya News
New Page 1

හිර ගෙදර රජවෙන්න දඟලන පාතාල සටනේ ඇතුළු පැත්ත


2020-02-15 09:21:13 -  644 යි

2020 වසර උදා වූවා පමණි. වැලිකඩ බන්ධනාගාර වාට්ටුවක හදිසියේ ඇසුනු විලාප හඬකි. වටපිටාවේ සිරකරුවන් පොරකමින් එතැනට එක්කාසු විය. එක් සිරකරුවකු විසින් තවත් සිරකරුවකුට පිහියකින් ඇන තිබේ. සැබෑවටම පිහි ඇනුමකට එහා ගොස් බඩ කපාගෙන ගොස් ඇති බව පෙනුණි. කැපුම් සිදුරෙන් එළියට පැන ඇති අතුණු බහන් අතින් එක්කාසු කරගෙන විලාප තබමින් සිරකරු දුවන්නට විය. මේ වැලිකඩ හා CRP හෙවත් කොළඹ රිමාන්ඩ් බන්ධනාගාරයේ තත්ත්වයයි. සෑම දිනකම පාහේ ඒ තුළ අවම තරමින් පහරදීම් දෙක තුනක් වේ. මේ තුළ සිටිනා දරුණු ගණයේ අපරාධකාරයන් හා සැලකීමේදී එවැන්නක් විය හැකි බවට ඕනෑම අයකුට සාධාරණව උපකල්පනය කළ හැකිය.

මෙවැනි තත්ත්වයක් මත ගත වූ සතියේදී කොස්ගොඩ තාරක සිරමැදිරියෙන් පිටතට එන්නට දෙන උදෑසන 6ත් - 7ත් අතර කාලසීමාවේදී වෙනත් සිර මැදිරියක සිටි අයකුට පහරදුන් පුවතක් වාර්තා විය. ඕනෑම පුවතක් යනු, එහි පතුලට කිඳා බසින්නේ නම් නොසිතනා කතා රැසක උපතකි. මෙකී පුවතේ පතුල සොයා යන විට හමුවූයේ මෙතෙක් මාධ්‍යවලට සැඟවී තිබූ මහා යුද්ධයක පෙර නිමිතිය.

කොස්ගොඩ තාරක සිපිරිගතව සිටින්නේ මාතර ස්වර්ණාභරණ මංකොල්ලය නිසාය.

මාතර මංකොල්ලයෙන් පසුව තාරක හා ඔහුගේ සහෝදරයා මුලින්ම රැගෙන යන්නේ අඟුණකොළපැලැස්ස බන්ධනාගාරයටය. එහි පැමිණෙන අයියා - මලෝ දෙදෙනා වෙනුවෙන් පිළිගැනීමේ සාදයක් පවා පැවැත්වූ බව කියැවේ. ඒ ඔවුන්ගේ ලෝකයයි. තාරක වෙනුවෙන් අදාළ සාදය සංවිධානය කරවන්නේ මාකදුරේ මධුෂ්ය. මධුෂ්ද, තාරකද දෙදෙනාම බෙන්තර ගඟේ එහා එවුන්ය. උන් අතර ඇති තමන්ගේ කම දකුණේ පාතාලය කොතරම් අවසන් කරන්නට උත්සාහ කළද කරන්නට නොහැක්කක් බවට පත්වීමේ මූලික හේතුවය. තමන්ගේ කම මෙන්ම, ගඟේ එහා එවුන් වෛරක්කාරයන් කරගත් පසු සිදුවන වින්නැහියද ඊට දෙවැනි නැත. 

දකුණේ උපන් කොස්ගොඩ තාරකට එරෙහිව දැන් මිහිපිට සිටිනා ලොකුම වෛරක්කාරයා වන්නේද දකුණේම එකෙක් වන්නේ එහෙයිනි. හේ දකුණේ පමණක් නොවේ තාරකගේ ගමේමය. එපමණක්ද නොවේ. තාරකගේ මුල්ම මංකොල්ලය කරන්නේද ඔහු සමඟය. හේ කොස්ගොඩ සුජීය.

ශ්‍රී ලංකාවේ ක්‍රියාත්මක බලවත්ම පාතාල කල්ලි ලෙස සැලකෙන්නේ මාකදුරේ මධුෂ්ගේ සහ කොස්ගොඩ සුජීගේ කල්ලි දෙකය. කොස්ගොඩ සුජී සිය කල්ලිය පාලනය කරන්නේ ඩුබායි සිටය. ඔහුගේ කල්ලියේ එල්.ටී.ටී.ඊ. වෙඩික්කරුවෝද සිටිති. පසුගියදා සිය දියණියගේ ශිෂ්‍යත්වයට පෙර දිනයේ බන්ධනාගාර පුහුණු පාසලේ ප්‍රධාන ජේලර් තෙන්නකෝන් ඝාතනය පිටුපස සිටින පොඩි ලැසී මෙන්ම කරන්දෙණියේ සුද්දාද කොස්ගොඩ සුජීගේ අනු කල්ලියක ප්‍රබලයෝය. දැනට වැඩිම සාමාජිකයන් පිරිසක් සිටින්නේ කොස්ගොඩ සුජීගේත් මාකඳුරේ මධුෂ්ගේත් කල්ලි දෙකටය. ඔවුන්ගේ සාමාජික ගණත්වය සියයකට වැඩි මිස අඩු නැත. මේ කල්ලි දෙකට සම්බන්ධ වැඩි පිරිසක් දැන් සිටින්නේ හිරේය.

බන්ධනාගාරයේ නීතිය අනුව එකම නඩුවක විත්තිකරුවන් හෝ එක වාට්ටුවක සිටිය නොහැකිය. බන්ධනාගාරයේ ඇතැම් උන්දැලාට පඬුරු පාක්කුඩම් දීමෙන් මෙම නීතිය නැවිය හැකිය. ඊට හොඳම උදාහරණය කොළඹ රිමාන්ඩ් බන්ධනාගාරයේ සිටිනා සෙල්විගේ පුත්තුන්ට ලැබෙනා සැපය. කොටි සංවිධානයේ අවශ්‍යතාව පරිදි ගෝඨාභය රාජපක්ෂ ඝාතනයටත්, එය නොහැකි වූ විට ඒ පිළිබඳ තොරතුරු ලබාගන්නට සිටිනා හොඳම සාක්ෂිකාරයා ඝාතනයටත් උරදී සිටින කන්ජිපානි ඉම්රාන් හා සෙල්විගේ පුත්තු තිදෙනා දැන් බන්ධනාගාරය තුළ උපරිම සැප විඳිමින් පසුවේ. මුලින් කී නීතිය නමා, සෙල්විගේ පුතුන් තිදෙනාම සිටින්නේ එක කූඩුවේය. ඔවුන්ට මෙය තමන්ගේ නිවෙස මෙනි. බන්ධනාගාර ඉතිහාසයේ කිසිදාක මෙලෙස එකම පවුලේ අය එකම කූඩුවේ තබා සැප ලබාදී නැත. දැන් එය එසේ වෙමින් පවතී.

මින් පෙර අපි හෙළි කළ පරිදි ගෝඨාභය රාජපක්ෂ මහතා ඝාතනය කරන්නට පැමිණි විදුරංග හෙවත් විත්තාට සයිනයිඩ් එන්නත් කර මරා දමන්නට උත්සාහ කළ සිදුවීම බන්ධනාගාරයේ නිලයක් විසින් වහාම වසා දැමුණි. දැන් මේ කියනා නිලය නයි වෛර බැඳ සිටින්නේ එකී පුවත බන්ධනාගාරයෙන් පිටතට දුන්නා යැයි සැක කරන පිරිස සමඟ හා විත්තාට ආරක්ෂාව ලබාදෙමින් සිටිනා පිරිස සමඟය. කොස්ගොඩ තාරක සිටින්නේ විත්තාට ආරක්ෂාව ලබාදෙන කණ්ඩායමේය. එබැවින් කුමන හෝ ආකාරයකින් තාරකව වැලිකඩින් ඉවත් කර විත්තාව තනිකරගැනීමේ මෙහෙයුම දැන් ආරම්භ වී ඇත.

මීට පෙරද තාරක මරා දමන්නට අර්ථීට් අවි පවා සූදානමින් තිබියදී හෙළි විය. ඒ ඔහු වැලිකඩ බන්ධනාගාරයෙන් දුරකට යවා, එහි සිට නැවත නඩු කටයුතු සඳහා කොළඹ රැගෙන එද්දී මරා දමන්නටය. එසේම තාරක මින් පෙර රඳවා සිටි අඟුණකොළපැලැස්ස බන්ධනාගාරයේ සිට ගාල්ලට රැගෙන එන අතරේ, කළුතරදී සමයන් ඝාතනය කළ ලෙසට ඝාතනය කරන්නට සූදානමින් සිටි පිරිසක් 2019 වසරේදී අත්අඩංගුවට ගන්නේ උණ්ඩ 3000ක්ද සමඟය. තාරකට එරෙහිව ඇති නඩුවලට කළුතර, බළපිටිය, මොරටුව, ගල්කිස්ස, ගංගොඩවිල, හෝමාගම අධිකරණවලට රැගෙන එන අතර එම අවස්ථාවල පහරදීමට උත්සාහ කරන බව පාතාල මර්දන ඒකකද අනාවරණය කරගෙන තිබුණේය. කොස්ගොඩ සුජී මෙම ඉලක්කය ගැනීමට පවරා තිබුණේ තමාගේ ළඟම සඟයන් වූ දකුණේ පාතාලයේ රණා, රාජු, කරන්දෙණියේ සුදු මල්ලි, පොඩි ලැසී ඇතුළු ගාල්ල බන්ධනාගාරයේ රජ කරන කණ්ඩායමටය. නමුත් ඔවුන්ට ඉලක්කයන් වෙත යෑමට අසීරු නිසා උෟරගහ මයිකල්වත් ලංකාවට එවූ බව කියැවෙන්නේය. ලැබී ඇති බුද්ධි තොරතුරු අනුව ආර්.පී.ජී. ඇතුළු අවි ආයුධ රටට ඇතුළු වී ඇත්තේ වැලිගමට නුදුරු මිරිස්ස ප්‍රදේශයෙනි. මෙම තොරතුරු අනුව දැන් දකුණේ පොලිසිද කැලඹී ගොසිනි. ඒ මෙම අවි ආයුධ තවත් ලේ වැගිරීමකට මිස වෙනකකට නොවන බව දන්නා නිසාය. මේ මහ සටන යට සැබෑවටම ඇත්තේ කිසිවකු නොසිතනා කතාවකි.

මේ වනවිට ගාල්ල, තංගල්ල, බූස්ස යන බන්ධනාගාර සියල්ලම ඇත්තේ මුස්ලිම් පාතාලයේ පාලනයට යටත්වය. නිලධාරීන් කොතරම් සිටියද මෙකී බන්ධනාගාරවල තීරණ ගන්නේ එහි පාලන බලය හිමි කණ්ඩායම විසිනි. මධුෂ් සමඟ ඩුබායි සිටි කන්ජිපානි ඇතුළු මුස්ලිම් කුඩු ජාවාරම්කරුවන් ඒ සඳහා පිරී ඉතිරී යන්නට වියදම් කරමින් සිටියේය. රට තුළ මුස්ලිම් පාතාලය බලවත් වෙද්දී රටේම හෙරොයින් වෙළෙඳපොළ තනිව අයිතිවන්නේද මුස්ලිම් පාතාලයටය. වක්‍රව කියන්නේ නම් කන්ජිපානි ඉම්රාන් ඇතුළු පිරිසටය. එබැවින් මෙරට පාතාලය පාලනය වන බන්ධනාගාරද කෙසේ හෝ මුස්ලිම් ආධිපත්‍යයට නතු කරගත යුතුය. නමුත් හදිසියේම කන්ජිපානි ඇතුළු පිරිස ඩුබායිහිදී අත්අඩංගුවට පත් විය. අනතුරුව මෙරටට පිටුවහල් කළ අතර මෙරටදීද නැවත අත්අඩංගුවට පත් විය. දැන් කන්ජිපානි ඉම්රාන් සිටින්නේ මෙතෙක් ඔහු මුදල් වියදම් කොට තැනූ බන්ධනාගාර පාතාලය තුළය. නමුත් ඔහු බලාපොරොත්තු නොවූවක් මේ තුළද සිදුවිය. එනම්, වැලිකඩ බන්ධනාගාරය තුළ තවමත් මුස්ලිම් පාතාලයට බලය තහවුරු කරගන්නට හැකි වී නැත. ඒ වෙනුවෙන් ගත වූ කාලය පුරාම සිංහල හා දෙමළ සිරකරුවන්ට ඇති පදම් හෙරොයින් සැපයීම සිදුවිය. තමන්ගේ රාජ්‍යයට එක්කාසු වෙන සියල්ලන්ටම එලෙස මත්කුඩු, සිගරැට් ලැබේ. 

මේ අතර දෙමළ සිරකරුවන් අතරින් කන්ජිපානිට යෝජනාවක් ලැබිණි. තම ඉහළ නායකයන්ගේ ඉල්ලීම පරිදි, ගෝඨාභය රාජපක්ෂ ඝාතනයට සූදානම් කර තිබූ අයකු දැන් තම නායකයන් පාවාදෙන්නට සූදානමින් සිටින බවත් අදාළ පුද්ගලයා ඝාතනය කරන්නේ නම් වැලිකඩ බන්ධනාගාරය තුළදී තමන්ගේ සහාය කන්ජිපානිගේ පිරිසට හිමිවන බවත්ය. විත්තා හෙවත් විදුරංග ඝාතනය සැලැසුම් වන්නේ මේ අනුවය. විදුරංගගේ පිනකට මෙන් සයිනයිඩ් ප්‍රහාරය එල්ලවන මොහොතේ විදුරංග අසල සිටියේ කොස්ගොඩ තාරකගේ මල්ලීය. මල්ලී වහාම විදුරංග ආරක්ෂා කරන්නට පැන්න බැවින් තාරකටත් කොහේ‍ෙදා් සිට මේ කන්ජිපානි - LTTE  ගනුදෙනුවේ කොටසක් වන්නට සිදුවිය. අවසානයේ දැන් කන්ජිපානි ඇතුළු පිරිසගේ ඝාතන ඉලක්ක දෙකකි. එකක් විදුරංගය. දෙවැන්නා තාරකය.

කන්ජිපානි වෙනුවෙන් සියලු වියදම් දරන්නේ දැනට ඉන්දියාවේ සිටිනා පාතාලයෙකි. මෙහි ඇති අපූරු කරුණ වන්නේ කන්ජිපානි සමඟ මුස්ලිම් පාතාලය ශක්තිමත් කරන්නට එකතු වී සිටිනා සිංහල පාතාලයන්ය. හෙරොයින් හෝ මුදල් හෝ නිසා බන්ධනාගාරය තුළ මුස්ලිම් පාතාලය වෙනුවෙන් පෙනී සිටිනා සිංහල අපරාධකරුවන් රැසකි. සිංහල වේවා, මුස්ලිම් වේවා, දමිළ වේවා සියල්ලෝම අපරාධකරුවන්ය. මේ සමාජයේ පවට උපත ලැබූ, නීතියෙන් හෝ සොබාදහමෙන් දඬුවම් ලැබිය යුත්තන්ය.

පාතාල කල්ලිවලට උපකාර හම්බ කරගන්නා ඇතැම් නිල ඇදුම් දරන්නන්ගේ පව් ගෙවන්නට වන්නේ ඔවුන්ගේ දරුවන්ටය. දැනට යම් කාලයකට පෙර ඝාතනය වූ එක් නිලධාරියකුගේද මෙවැනි දුක්බර සම්බන්ධතා ඇතැයි හෙළිව ඇත.

කොස්ගොඩ තාරකට එරෙහිව කොස්ගොඩ සුජී ඩුබායි සිටම මරණ වරෙන්තුව නිකුත් කරන්නේ 2017 වසරේදී තම මාමා වූ ජගමුණි මහින්ද රාජා ඇතුළුව ඔහුගේ පවුලේ සිවුදෙනකු එකම දිනක ඝාතනය කිරීමේ පළිය ගන්නටය. කොස්ගොඩ පොලිස් වසමේ යුද පිටියක් කරමින් ගම් තුනකට පැය භාගයක් තුළ කඩාවැදී හතරදෙනාම මරා දැමුවේ කොස්ගොඩ තාරක ඇතුළු කණ්ඩායමකි. මහින්ද රාජා කලක් බළපිටියේ එජාප මන්ත්‍රිවරයකුද වූයෙන් කොස්ගොඩ සුජීට ඔහුගෙන් විශාල රැකවරණයක් විය. මාමාගේ පවුලට කළ අපරාධයට ලෙයට ලෙය පළිගන්නට කොස්ගොඩ සුජී තම කණ්ඩායම් යවා 2017 ඔක්තෝබර් 31දා රාත්‍රියේ බටපොළදී කොස්ගොඩ තාරකගේ මාමා වූ අසංක මනෝරාජ්ද සොයිසා ඇතුළු දරුවන් තිදෙනාත් අසල සිටි අයකුත් ඇතුළු පහකට වෙඩි තැබූහ. එතැනදී පස්දෙනාම තුවාල ලබා බේරුණෙන් සුජී තම පළිය කොයි මොහොතේ හෝ ගන්නට සැලසුම් කළද තාරක සැඟවුණු චරිතයක් නිසා කොටු කරගත නොහැකි විය. ජාත්‍යන්තර රතු නිවේදන පවා නිකුත් කර ඇතත් අදටත් කොස්ගොඩ සුජී හෙවත් ජගමුණි සුජීව ද සොයිසා ඩුබායි රාජ්‍යයේ සිට මෙරටට ගෙන්වාගත නොහැකිව ඇත්තේය. මාන්නගේ ‍ෙදාන් රොෂාන් පද්ම කුමාර නමින් 55233373 දරන ව්‍යාජ විදේශ ගමන් බලපත්‍රය භාවිත කරමින් 2016 පෙබරවාරි 14දා ඩුබායි බලා ගිය සුජීගේ විවාහයට පවා අස්සන් කර රටින් පනින්නට උදවු කරන්නේත් වත්මන් රජයේ ප්‍රබල අමාත්‍යවරයකුමය. ගණේමුල්ල මාකිලංගමුවේ සංජීව නමැති එල්.ටී.ටී.ඊ. කල්ලි සමඟ සබඳතා පැවැත්වූ පාතාල නායකයා සමඟත්, කිඹුලාඇළ ගුණාගේ කල්ලි සමඟත් ඍජු සබඳතා පවත්වන බව කියැවේ. දෙමටගොඩ පොලිසියේ දූෂණ මර්දන අංශයේ ස්ථානාධිපතිවරයාව සිටි ඩග්ලස් නිමල් සහ ඔහුගේ බිරිය අතුරුගිරිය පාරේ ප්‍රදේශයේදී වෙඩි තබා ඝාතනය කරවන්නේද කිඹුලාඇළ ගුණා ඉන්දියාවේ සිටය.

තාරකව ඝාතනය කරන්නට ආර්.පී.ජී. අවි කිහිපයක් බෝට්ටු මාර්ගයෙන් මෙරටට පැමිණ ඇති බව පසුගිය සමයේ හෙළි විය. ඉතාලියේ සිටින රත්ගම නදුන්ගේ සහාය මැද කොස්ගොඩ සුජී මෙරටට ආර්.පී.ජී. අවි දෙකක් හා ටී 56 දහයක් කුඩු රැගෙන එන බෝට්ටුවලින් රැගෙන ආ වග බුද්ධි අංශවලට තොරතුරු ලැබුණේ උෟරගහ මයිකල්ගේ ආගමනයත් සමඟය. උෟරගහ මයිකල් රට තුළ සිටින බවට තහවුරු වන්නේ ඇල්පිටියෙන් මෙම සතියේ යළිත් පාතාල ඝාතනයක් සිදුවීමෙන්ය. අලුත්ගම සිට ඇල්පිටිය බලා ගමන් ගත් ලංගම බස් රථයකට නැඟගත් වෙඩික්කරුවන් රංජිත් ජයවර්ධන නමැති අයව ඝාතනය කරන්නේ පසුගිය 06දාය. ඇල්පිටියේ පළාත් පාලන ඡන්දය ප්‍රකාශයට පත් කිරීමෙන් පසුව මෙම ඝාතනය සිදුවන්නේ කොස්ගොඩ සුජීගේ අණින්ය. ඇල්පිටිය, රත්තොටුවිලදී චමිල දීපාල් හා සමන් සුරේෂ් දෙදෙනා ඝාතනය කර සමන් 

සුරේෂ්ගේ බෙල්ල කපාගෙන ගොස් රත්තොටුවිල සමුපකාරය අසල තබා ගොස් තිබුණේය. ඒ සුජීගේ කල්ලියත් මේ ආකාරයට තම ප්‍රතිවිරුද්ධ කල්ලියේ අයකුගේ ගෙල කපා විත් මෙම ස්ථානයේ දමා යෑමෙන් පසුය.

දැනට කලෙකට පෙර මාකදුර මධූෂ් හා කොස්ගොඩ තාරක මිතුරන්ය. නමුත් තාරක, සමයන් හා මිතුදම් ගොඩනඟා ගත් බව දැනගන්නා මධුෂ්ද තාරක සමඟ වෛර බැඳගනී. මධුෂ්ගේ අතවැසියා වූ කන්ජිපානි ඉම්රාන් සිරගෙදරදී කොස්ගොඩ තාරකව ඝාතනය කරන්නට ගත් පළමු උත්සාහය ගත වූ සතියේ වාර්තා විය. ඒ වෙනුවෙන් කන්ජිපානි කොන්ත්‍රාත්තුව ලබාදෙන්නේ හර්ෂ නමැත්තකුටය. ඔහු වත්තල ප්‍රදේශයේ ඝාතනයකට මෝටර් සයිකලය පදවා මාට්ටු වූ පාතාලයේ ළදරුවෙකි. ඔහුගේ 

ළදරුභාවය දන්නා තාරක උදෑසන ගොස් ඔහුට තරවටු කරන්නේ වැඩක් බලාගෙන පාඩුවේ හිටපන් කියාය. සැබෑ කතාව නොදැන එළියට එන්නේ මෙම සිදුවීමයි.

එපමණක් නොවේ. වත්මන් ජනපති ගෝඨාභය රාජපක්ෂ මහතා පසුගිය දිනෙක බන්ධනාගාරයේ චාරිකාවක නිරත විය. ඔහු එම සංචාරය සිදු කළේ හේතුවක් රහිතව වන්නට නොහැකිය. මේ වනවිට මෙරට බන්ධනාගාරවල වඩාත්ම දූෂිතව ඇත්තේ ඒවායේ සිටිනා ඇතැම් නිලධාරීන්ය. අවම තරමින් බන්ධනාගාර කොමසාරිස්ව ජෙනරාල්වරයාට පවා පාලනය කළ නොහැකි බලයක් වැලිකඩ හා කොළඹ රිමාන්ඩ් බන්ධනාගාර තුළ කන්ජිපානි ඉම්රාන්ගේ කණ්ඩායමට තිබේ. ඊට හේතුව වන්නේ මුදලට කෑදර හරුම නිලධාරීන්ය. මුදලට ඇති ආශාව වෙනුවෙන් බන්ධනාගාරය තුළ ඔවුන්ට උපරිම සැප ලබාදෙන්නටත්, ඔවුන්ට විරුද්ධ වන පිරිස කෙසේ හෝ වෙනත් බන්ධනාගාරවලට මාරු කරවන්නටත් ඔවුහු ක්‍රියාමාර්ග ගනිති. මෙරට පාතාල මර්දනයේ ඇසූ පිරූ අත්දැකීම් සහිත වත්මන් ජනපතිවරයා මෙකී පාදඩ නිලධාරීන්ගෙන් මෙරට නීතිය බේරාගනු ඇතැයි බන්ධනාගාර තාප්පයෙන් එපිට - මෙපිට සිටිනා සියල්ලෝම උදෙක් බලාපොරොත්තු වෙති.

ප්‍රසාද් අබේවික්‍රම 

  ඔබේ අදහස්
  ඔබේ අදහස් ඔබට කැමති අයුරින් මෙහි ලියන්න
 
 
 
 
16 + 13 =       

New Page 1

  2014 by www.eethalayanews.com