www.eethalayanews.com
  New Page 1
New Page 1
Eethalaya News
New Page 1

ජනතාවට බත් වෙනුවට වස කැවූ නිව් රත්න හාල් මෝලට සීල්


2019-11-28 07:26:12 -  664 යි

පරිභෝජනයට නුසුදුසු කල් ඉකුත් වූ සහල් තොග අලුත් සහල්වලට මිශ්‍ර කර රට පුරා විකිණීමේ මහා පරිමාණ ජාවාරමක් සිදු කළ බව කියන පොළොන්නරුව සිංහපුර නව රත්න සහල් නිෂ්පාදනාගාරයට මුද්‍රා තබා ඇත. පාරිභෝගික කටයුතු පිළිබඳ අධිකාරිය, පොළොන්නරුව මහජන සෞඛ්‍ය පරීක්ෂක නිලධාරීන් සහ ​පොලිසිය ඊයේ (27 වැනිදා) දහවල් මෙම පියවර ගෙන ඇත.

කල් ඉකුත් වූ සහල් තොග අලුත් සහල්වලට මිශ්‍ර කර විකිණීමේ මහා පරිමාණ ජාවාරමක් රත්න සහල් නිෂ්පාදනාගාරයේ සිදුකෙරෙන බවට දෙරණ රූපවාහිනි නාළිකාවේ උකුස්සා වැඩසටහන මගින් පෙරේදා (26 වැනිදා) අනාවරණය කිරීමෙන් අනතුරුව එදිනම රාත්‍රී එම ස්ථානය වැටලීමට පාරිභෝගික කටයුතු අධිකාරිය කටයුතු කළේය.

ගුල්ලන්, පණුවන් සහිත කල් ඉකුත් වූ සහල් තොග සහල් නිෂ්පාදනාගාරයට ගෙනැවිත් යළි ඒවා යන්ත්‍රානුසාරයෙන් පිරිසිදු කර අලුත් සහල්වලට මිශ්‍ර කර වෙළෙඳපොළට යවා ඇත්තේ කල් ඉකුත් වන දින ආදියද වෙනස් කරමිනි.

පාරිභෝගික කටයුතු පිළිබඳ අධිකාරියේ අධ්‍යක්ෂ (පාරිභෝගික කටයුතු සහ තොරතුරු) අසේල බණ්ඩාර ඇතුළු නිලධාරීන් පිරිසක් අදාළ සහල් නිෂ්පාදනාගාරය ඊයේ (27 වැනිදා) පරීක්ෂාවට ලක්කරන ලදී.

ශ්‍රිලනිපයෙන් පොළොන්නරුවට ඡන්දය ඉල්ලූ ලංකේෂ්වර මිත්‍රපාලට අයත් එම නිෂ්පාදනාගාරයේ තිබූ සහල් කිලෝග්‍රෑම් දෙලක්ෂ හතළිස් දහකට මුද්‍රා තැබීමට පාරිභෝගික කටයුතු පිළිබඳ අධිකාරියේ නිලධාරීන් කටයුතු කර ඇත.

මෙම සහල් මලුවල සඳහන් දිනය අනුව ඒවා මනුෂ්‍ය පරිභෝජනයට නුසුදුසු ඒවා බවත්, එමෙන්ම ඒවායෙහි මිල ගණන්ද වෙනස් කර සඳහන් කර තිබූ බවත් පාරිභෝගික කටයුතු පිළිබඳ අධිකාරි​යේ අධ්‍යක්ෂ (පාරි​භෝගික කටයුතු සහ තොරතුරු) අසේල බණ්ඩාර පවසයි.

කල් ඉකුත් සහ අලුත් සහල් තොග නිෂ්පාදනාගාරය තුළම ගබඩා කර තිබූ බවද සඳහන් වේ. පොළොන්නරුව මහජන සෞඛ්‍ය පරීක්ෂකවරුන්ද මේ පිළිබඳ පරීක්ෂණයක් ආරම්භ කර ඇත. මෙම සහල් ව්‍යාපාරයට විරුද්ධව අධිකරණයේ නඩු පැවැරීමට නියමිතව ති​බේ.

ඇමැති චමල් රාජපක්ෂ, පාරි​භෝගික කටයුතු පිළිබඳ අධිකාරියේ අධ්‍යක්ෂ ජනරාල් එම්.එස්.එම්. ෆවුසර් යන අයගේ උපදෙස් මත අධ්‍යක්ෂ (පාරිභෝගික කටයුතු සහ තොරතුරු) අසේල බණ්ඩාර, සහකාර අධ්‍යක්ෂ තාරක විදානගමආරච්චි යන අයගේ අධීක්ෂණය යටතේ ​පොළොන්නරුව දිස්ත්‍රික් ජ්‍යෙෂ්ඨ විමර්ශන නිලධාරී එච්.ජී.සී. චන්ද්‍රකුමාර ඇතුළු නිලධාරීන් මෙම වැටලීම කර ඇත.

  ඔබේ අදහස්
  ඔබේ අදහස් ඔබට කැමති අයුරින් මෙහි ලියන්න
 
 
 
 
14 + 17 =       

New Page 1

  2014 by www.eethalayanews.com