www.eethalayanews.com
  New Page 1
New Page 1
Eethalaya News
New Page 1

දවස තිස්සේම බීලා ඉන්නවාට පුද්ගලයකුට හැමදාම හවසට වැලිපැන්න පොලීසියේ පහන තියන්න නියෝග කරලා


2019-07-26 07:42:35 -  245 යි

බීමත්ව තම බිරියට පහර දී නිවසේ මුළුතැන්ගේ උපකරණ සහ ශීතකරණය ඇතුළු උපකරණ ගිනි තැබූ තදින්ම බීමට ඇබ්බැහිවූ අයකුට වැලිපැන්න පොලිස් ස්ථානාධිපතිවරයා පසුගියදා අපූරු දඬුවමක් ලබාදුන්නේය.

වසර ගණනාවක සිට තදින්ම බීමට ඇබ්බැහි වූ මෙම පුද්ගලයා දරුවන් තිදෙනකුගේ පියෙකු වන අතර දවස පුරා බීමතින් සිටීම නිසා බිරිය දරු පවුල රැක ගන්නේ පෞද්ගලික ආයතනයක රැකියාවක නිරතවෙමින්ය. දවස පුරා තම මිතුරන් සමග එක්ව බීමතින් සිටින මෙම පුද්ගලයා රැකියාව අවසන්ව නිවසට පැමිණෙන බිරිය සමග කළහ කර ගැනීම දිනපතා සිදුකරන අතර එම අවස්ථාවල නිවසේ සිටින දූ දරුවන්ට අසභ්‍ය වචනයෙන් බැන වැදී නිවසේ භාණ්ඩවලට අලාභහානි කිරීම සිදුකරන බවත් පසුගියදා ද එසේ කළහ කර නිවසේ මුළුතැන්ගේ උපකරණ සහ ශීතකරණය ඇතුළු භාණ්ඩ සියල්ලට ගිනි තබා විනාශ කළ බවත් සැමියාගේ මෙම ක්‍රියාවන් නිසා තමා ඇතුළු දරුවන්ට නිදහසේ ජීවත් වීමට නොහැකිවී ඇති බවත් එම පුද්ගලයාගේ බිරිය විසින් වැලිපැන්න පොලිසියට පැමිණිලි කර තිබුණි.

ඒ අනුව වැලිපැන්න පොලිසියේ නිලධාරීන් එම පුද්ගලයා අත්අඩංගුවට ගෙන ස්ථානාධිපතිවරයා වෙත ඉදිරිපත් කෙරිණි. එහිදී ස්ථානාධිපතිවරයා ඔහුගෙන් ප්‍රශ්න කිරීමේදී ඔහු තදින්ම මත්පැන් පානයට ඇබ්බැහි වී ඇති බව තේරුම් ගෙන බිරිය සහ දරුවන් සමග ගැටුම් ඇති කර නොගෙන මත්පැන් පානය අතහැර ජීවත් වන ලෙස අවවාද කර පොලිස් ස්ථානාධිපතිවරයාගේ නිල කාර්යාලයේ තැන්පත් කර ඇති බුදු පිළිමය වෙත ගොස් පන්සිල් සමාදන් වන ලෙස දන්වා ඇත. බුදු පිළිමය අභියසට ගිය මෙම පනස් හැවිරිදි පුද්ගලයාට පන්සිල් අමතකව ගොස් ඇති අයුරු පොලිස් ස්ථානාධිපතිවරයාට නිරීක්ෂණය විය.

පන්සිල් අමතකවීමට තරම් බීමතට ඇබ්බැහි වූ මෙම පුද්ගලයාට ශාරීරික දඬුවමක් ලබාදීමෙන් ප්‍රයෝජනයක් නොමැති බැවින් පොලිස් ස්ථානාධිපති ඩබ්ලිව්.කේ. ගමගේ මහතා අපූරු දඬුවමක් නියම කළේය. එනම් එම පුද්ගලයාගේ 8 හැවිරිදි පාසල් යන දියණියගෙන් පන්සිල් ඉගෙන ගෙන දින කීපයක් සවස 6ට පොලිස් ස්ථානාධිපතිවරයාගේ නිල කාමරයේ තැන්පත් කර ඇති බුදු පිළිමයට මල් පහන් පූජා කරන ලෙස නියම කිරීමය. මේ පාරවත් මේ මිනිහා හැදුනොතින් හොඳ යැයි පවසමින් සැමියාව ද කැඳවාගෙන බිරිය වැලිපැන්න පොලිස් ස්ථානයෙන් පිටව යන අයුරු දක්නට ලැබුණි.

  ඔබේ අදහස්
  ඔබේ අදහස් ඔබට කැමති අයුරින් මෙහි ලියන්න
 
 
 
 
19 + 11 =       

New Page 1

  2014 by www.eethalayanews.com